«Баланы мектепке дайындайық»: Алматыда 200 бала мектепке қажетті құралдарға ие болды

Amanat партиясының акциясы аясында бұл жолғы көмекке кәсіпкер Аманжол Рысмендиев демеушілік етті.

Қазақстан Конституциясының 30 жылдығына орай, Алматыда «Баланы мектепке дайындайық!» қайырымдылық акциясының тағы бір шарасы өтті. Кәсіпкер Аманжол Рысмендиевтің қолдауымен қаладағы 200-ге жуық оқушыға мектепке қажетті құрал-жабдықтар берілді. 

Жалпы, биылғы 11 тамыздан басталған акция аясында қалада 2 мыңға жуық бала қажетті құралдармен қамтамасыз етілген. Жаңа оқу жылы қарсаңында бұл – көп балалы, тұрмысы төмен және мұқтаж отбасылар үшін балаларын мектепке дайындауда үлкен көмек. 

«Өзім шетелде жүрсем де, елімді ұмытпай, «Аманат» партиясының Алматы қаласындағы филиалының ұйымдастыруымен өтіп жатқан шараға компаниямыздың атынан қаржылық қолдау көрсетіп оытрмыз. Міне, Алматы қаласында 200-дей оқушыны қуанттық. Оларға сыйлық ретінде мектепке керекті құрал-жабдықтарын алып бердік. Оқушылардың оқуда озат болуын тілеймін», – деді кәсіпкер. 

Айта кетейік, балаларды мектепке дайындауға көмек көрсету акциясы 2010 жылдан бері үздіксіз жалғасып келеді. Оның негізгі мақсаты – балаларды жаңа оқу жылына дайындап қана қоймай, оларға қуаныш сыйлау. Білімге деген ынтасын арттырып, ата-аналарына қолдау көрсету. Осы аралықта Алматыда 30 мыңға жуық балаға көмек берілген.